बाग्लुङ : बाग्लुङको पश्चिमवर्ती विकट क्षेत्र सुखौराका बासिन्दा पिउने पानीको चरम समस्या झेलिरहेका छन्  । पर्याप्त पानीका स्रोतको अभाव र भएका स्रोतको पनि उचित व्यवस्थापन हुन नसक्दा सुखौरावासीले खानेपानीको समस्या भोग्नुपरेको हो ।

एक गाग्री पानी ल्याउन दुइ घन्टा हिँडनुपर्ने बाध्यता सुखौरा गाविसका २ सय ६७ घरधुरीले भोग्नुपरेको छ । सुखौरा गाविसका वडा नम्बर ७, ६, २, ३, १, ४ र ५ का बासिन्दाले सबैभन्दा बढी खानेपानीको समस्या झेल्दै आएका छन् । हुनेखानेले पाइप जडान गरेर घरमै पानी पुर्याए पनि अधिकाँशले खोला, खोल्सा र कुवाको फोहोर पानीका लागि लामो समय खर्चिनुपर्ने बाध्यता रहेको छ । वर्षको ६ महिना खोलाकै भए पनि ढुक्कसँग पानीको उपभोग गर्ने सुखौरावासीको दैनिकी बाँकी ६ महिनामा निकै कष्टकर बन्ने गरेको छ । बाहै महिना पानीको समस्या भोगेका सुखौरा ७ भित्री वनका डिलबहादुर सामतले १ गाग्री पानी ल्याउन २ घन्टा लगाएर जौवारी खोला अथवा भित्री वनको मूलमा जानुपर्ने बाध्यता रहेको बताए । 'खाना पकाउन, पिउन,  सरसफाई तथा वस्तुभाउका लागि पानीको निकै समस्या भएको छ' सामतले भने ।
एक गाग्री पानी ल्याउँदैमा विहान जाने गरेको सुखौरा ७ की तिर्सना थापामगरले बताइन । उनले भनिन 'स्कुले केटाकेटीलाई समयमै खाना पकाउन नभ्याउँदा कहिले त भोकभोकै जान्छन् ।' गाविसले विकास निर्माणको क्षेत्रमा बजेट विनियोजन गरे पनि मानवीय जीवनमा प्रत्यक्ष सरोकार राख्ने खानेपानीका लागि बजेट  विनियोजन नगरेको सुखौरा ४ माझगाउँका बलबहादुर थापाले गुनासो गरे उनले भने 'गाउँपरिषदमा हाम्रा कुराले प्राथमिक्ता नपाउँदा खानेपानीको समस्या परेको छ ।'
स्रोत : नयाँ पत्रिका दैनिक, ०६७ पौष १३, पेज नं. ८